Minsan parang Tanga lang

Halos malapit ng dumampi ang mapupulang niyang labi ng biglang may naaninag kang isang bagay na papalapit sa iyong mukha… lumilipad.

“Lutang ka na naman” sigaw ng titser di maipinta ang pagmumuka. Sabay tawanan ng mga kaklase mo kasama na ang crush mong napadaan lang nung mga oras na yun. Napahiya ka na naman, at sa harap na naman niya. Hindi sinasadyang makuha mo ang atensyon niya at kayo’y nagkatitigan ng mga dalawang segundo habang siya’y natatawa. Sulit na kapalit ng bukol sa ulo, Kumpleto na din ang araw mo! Madalas ka pang makita ng mga barkada mong nagtatatakbo habang may hawak na walis tambo na para bang hinahabol ka ng kampon ng mga kadiliman at hinihintay na sagipin ng mga idolo mong “maskman.” Paparating lang pala ang crush mong si Angela… parehas pala kayong “cleaners” nung araw na yun.
Bukod dyan e nahuli ka pa minsan ng kaklase mong nagtatago sa halaman at nagnanakaw ng “simoy” kay Angela habang naglalaro ng chinese garter kasama ang kaklase niyang animo’y may pagkabinabae sa sobrang kembot. Tinulak ka at napasubsob sa harapan ni Angela. Natigilan ka, napatitig, nanigas at napipi! Sabay takbo na naman na parang tanga lang.

Sa araw-araw na ginawa ng Diyos eh ganito lagi ang drama mo. Habang abala ang mga kaklase mo sa kakalaro ng sipa at jolen, ikaw naman ay walang inatupag kundi sumulyap ng sumulyap kay Angela. Hindi rin naman kita masisis dahil maganda si Angela. Bukod sa kulay asul niyang mga mata at nakakasilaw na kaputian ay nanjan din ang makapigil hininga niyang ngiti.

Lumipas ang mga araw, syempre walang inunlad ang diskarte mong patagong panliligaw sa kanya. Di mo namalayan na Marso na pala. Oo, malapit na ang bakasyon. Mga dalawang buwan din na hindi kayo magkikita. Hindi mo alam kung makakaya mo pa ba ang ganung katagal na hindi mo siya masisilayan. 

Nakita mo si Angela sa huling pagkakataon bago matapos ang buwan na iyon. May kakaiba sa kanyang ganda kaya naman napatitig ka ng husto. Ang haba ng maitim niyang buhok lalo na’t nakasuot siya ng puting damit. Kitang kita mo kung pano kumilos ang kanyang kaliwang kamay habang inaaangat ang tali ng kanyang toga papuntang kaliwa. Lumingon siya at nakita ka. Sa sobrang kaba mo ay napatalikod at tumakbo ka.

Dahil sa katangahan mo ay nabangga mo ko, ang kaklase mo simula pa nung unang marka sa elementarya. Natigilan ako, napatitig, nanigas at napipi! Sabay takbo na parang tanga lang. :)